भिलवडी : आषाढी एकादशी निमित्त भिलवडी शिक्षण संस्थेच्या इंग्लिश मिडियम स्कूलमध्ये बालचमूंची दिंडी...

============================================================================

आषाढी एकादशीच्या दिवशी शाळेला सुट्टी असल्याने आज शुक्रवार दि. ८ जुलै रोजी विठूनामाच्या गजराने भिलवडी शिक्षण संस्थेची इंग्लिश मिडियम स्कूल हि शाळा दुमदुमली होती. बालवारकऱ्यांनी हातात टाळ, मृदंग घेऊन विठूनामाचा जयघोष केला. तसेच वारी, रिंगण सोहळे, पालखीचे कार्यक्रम, अभंगांचे सादरीकरण शिक्षकांसह विद्यार्थ्यांनी उत्साहात केले.

विद्यार्थ्यांनी यावेळी पारंपारिक वेशभूषा साकारत विठूनामाचा गजर केला. यावेळी पालखी सोहळ्याचे, विठोबाच्या पालखी व दिंडीचे आयोजन करण्यात आले होते. दीपप्रज्वलन व विठ्ठल-रुक्मिणीच्या प्रतिमेचे पूजन करून सोहळ्याला प्रारंभ करण्यात आला.

विद्यार्थ्यांनी केलेल्या विठोबा-रखुमाईच्या वेशभूषेने हा सोहळा अधिक रंगला. विद्यार्थ्यांनी स्वत: हाताने तयार केलेल्या पालखीचे देखील विशेष आकर्षण होते. माऊली माऊली विठ्ठल विठ्ठल अशा जयघोषाने शालेय परिसर दुमदुमला होता.

तसेच यावेळी विविध संताची वेशभूषा विद्यार्थ्यांनी साकारली होती. महाराष्ट्राची भक्ती परंपरा व वारकरी संप्रदाय यांचे महत्त्व विद्यार्थ्यांना या कार्यक्रमातून सांगण्यात आले.

यावेळी के.जी.विभागाच्या मुख्याध्यापिका, शिक्षक व शिक्षकेतर सेवक व विद्यार्थी उपस्थित हाेते.