लघु उद्योजकांच्या जिल्हा पुरस्कारासाठी अर्ज करण्यास 20 जानेवारी अंतिम मुदत

(सुधारीत)

लघु उद्योजकांच्या जिल्हा पुरस्कारासाठी

अर्ज करण्यास 20 जानेवारी अंतिम मुदत

- महाव्यवस्थापिका विद्या कुलकर्णी

सांगली, दि. 7, (जि. मा. का.) : सांगली जिल्ह्यातील उद्योग क्षेत्रामधील असामान्य कामगिरी करणाऱ्या लघु उद्योजकांकरिता राज्य शासनामार्फत जिल्हा पुरस्कार देण्यात येतात. जिल्ह्यातील पात्र लघु उद्योजकांना तसेच ज्या उद्योजकांनी यापूर्वी अर्ज केले आहेत परंतु त्यांची निवड झाली नाही, अशा उद्योजकांना या पुरस्कारासाठी अर्ज करण्यासाठी अंतिम दिनांक 20 जानेवारी 2025 आहे, असे जिल्हा उद्योग केंद्राच्या महाव्यवस्थापिका विद्या कुलकर्णी यांनी प्रसिध्दीपत्रकाव्दारे कळविले आहे.

जिल्हा पुरस्कारासाठी प्रथम क्रमांकास 15 हजार रूपये, द्वितीय पुरस्कार 10 हजार रूपये, शाल, श्रीफळ, प्रमाणपत्र तसेच मानचिन्ह देण्यात येते. जिल्हा पुरस्कारासाठी उद्योग आधार हा स्थायी लघु उद्योग म्हणून उद्योग संचालनालय यांच्याकडे मागील तीन वर्षापूर्वी नोंदणीकृत असावा. तसेच मागील तीन वर्षे सलग उत्पादन प्रक्रियेत असलेला असावा. लघु उद्योग हा कोणत्याही संस्थेचा अथवा बँकेचा थकबाकीदार नसावा. तसेच यापूर्वी राज्य अथवा केंद्र शासनाचा कोणाताही पुरस्कार प्राप्त नसावा. पुरस्कारासाठी लघु उद्योगाची निवड करताना त्याने केलेली भांडवली गुंतवणूक, आधुनिक तंत्रज्ञान, सुव्यवस्थापन, घटनेचे ठिकाण, सामाजिक कार्य, कर्मचारी सोयी सवलती, आयात-निर्यात क्षमता, स्वावलंबन तसेच उद्योजक हा नवीन पिढीतील नवउद्योजक असावा, उत्पादित वस्तु बाबतची गुणवत्ता इत्यादी विचार करण्यात येतो.

पुरस्कारासाठी विहित नमुन्यातील अर्ज जिल्हा उद्योग केंद्र, सांगली यांच्याकडे विनामूल्य उपलब्ध आहेत. अर्ज करण्याकरिता तसेच पुरस्काराच्या अधिक माहितीसाठी महाव्यवस्थापक, जिल्हा उद्योग केंद्र, उद्योग भवन, सांगली यांच्याशी संपर्क साधावा, असे आवाहन प्रसिध्दीपत्रकाव्दारे केले आहे.